पोखरामा खुल्ने भयो लकडाउन, मध्यरातसम्म क्लब खुल्ने
जिल्ला प्रशासन कार्यालयले विज्ञप्ति जारी गर्दै लकडाउन खुलाउने निर्णय गरेको हो ।

पोखरा । असोज १ गतेबाट कास्की जिल्लामा लकडाउन खुल्ने भएको छ । जिल्ला प्रशासन कार्यालयले विज्ञप्ति जारी गर्दै लकडाउन खुलाउने निर्णय गरेको हो ।

विज्ञप्तिमा उल्लेख भए अनुसार,दैनिक क्रियाकलाप गर्दा स्वास्थ्य मापदण्ड अनिवार्य पालना गर्ने, विश्वविद्यालय, क्याम्पस, विद्यालयलगायत सबै शैक्षिक संस्था र प्रशिक्षण केन्द्रहरू भौतिक उपस्थितिमा संचालन गर्न सकिने छ । होटल तथा रेस्टुरेन्ट भने राती ११.३० बजेसम्म खोल्न पाइनेछ । साथै नाचघर, क्लब, डान्सबार, दोहोरी जस्ता रात्रिकालीन व्यवसायहरू राती १.३० सम्म खोल्न पाइने व्यवस्था गरिएको छ ।

पोखरा महानगरले पनि १ गतेदेखि नै नगरभित्रका सबै स्कुल भौतिक उपस्थितिमा खुला गर्न सूचना जारी गरेको छ । नगर शिक्षा समितिको बैठकले महानगरभित्रका सम्पूर्ण विद्यालय, पूर्वप्राथमिक विद्यालय, कोचिङ तथा ट्युसन सेन्टर र भाषा प्रशिक्षण केन्द्र खोल्ने निर्णय गरेको हो । भौतिक रूपमा खुलाउँदा स्वास्थ्यसम्बन्धी मापदण्ड अनिवार्य पालना गर्न र विद्यालय संचालन कार्यढाँचा, २०७७ अनुरूप संचालन गर्न पाउनेछन् ।

© 2021 Quicknepal.com  |  All Rights Reserved.