काठमाडौं । बुधबार हुने भनि मिती तोकिएको राष्ट्रिय सभा निर्वाचनको तयारी पूरा भएको छ । १९ सिटका लागि
सात वटा प्रदेशमा ८ मतदान स्थलका १४ मतदान केन्द्रमा मतदान हुँदैछ ।
मतदान गर्नु पुर्व मतदान स्थलको व्यवस्थापन, मतपत्र तयारी लगाएका कामहरु सम्पन्न भएको निर्वाचन आयोगले जनाएको छ ।
मतदान स्थलमा बुथ निर्माणको काम, मतदान अधिकृत खटाउने लगायतका काम सम्पन्न भएको आयोगका प्रवक्ता शालिग्राम शर्मा पौडेलले जानकारी दिए । उनले भने‘, ‘निर्वाचनको तयारी पूर्ण रूपमा सम्पन्न भइसकेको छ । मतदानको समय भने बिहान ९ बजेदेखि ३ बजेसम्म मतदान रहने छ ।’
निर्वाचन आयोगले २१ बुँदे स्वास्थ्य मापदण्डहरू तय गरेर निर्वाचन अधिकृतको कार्यालयमा पठाइसकेको छ । सरकार र सीसीएमसीले तयार गरेको स्वास्थ्य मापदण्डका आधारमा आयोगले स्वास्थ्य मापदण्डहरू तयार गरेको हो । स्वास्थ्य मापदण्डहररुको पूर्ण रूपमा पालना गरेर मतदान गर्ने भएको आयोगका प्रवक्ता शर्माले बताए ।
निर्वाचन सुरक्षाका लागि भने सम्बन्धित जिल्ला प्रशासन कार्यालयसँग समन्वय गरिएको उनले बताए । सुरक्षा व्यवस्थाका लागि गृह मन्त्रालय मार्फत सम्बन्धित जिल्ला प्रशासन कार्यालयले जिल्ला प्रहरी कार्यालयलाई सुरक्षा व्यवस्था मिलाउनका लागि अनुरोध गरेको छ ।
जिल्ला निर्वाचन अधिकारी, प्रमुख जिल्ला अधिकारी, सुरक्षा निकायका सम्पूर्ण पदाधिकारीहरू भएर आवश्यकता अनुसार निर्वाचन सुरक्षा बैठक बसेर सुरक्षाको सबै व्यावस्थापन मिलाइएको छ ।
यसैगरी फागुन २० गते राष्ट्रिय सभाका १९ सांसदको पदावधि समाप्त हुनेभएको छ । सो रिक्त स्थानमा एमालेका ८, एकीकृत समाजवादीका ४, माओवादी केन्द्रका ४ र काँग्रेसका ३ सांसद रहेका छ । सो रिक्त रहेको स्थानमा प्रदेश १ बाट ३, प्रदेश नम्बर २ बाट २ , बागमती प्रदेशबाट २, गण्डकीबाट ३, लुम्बिनीबाट ३, कर्णालीबाट ३ र सुदूरपश्चिम प्रदेशबाट ३ गरी १९ सांसद निर्वाचित हुन लागेका हुन् ।
आयोगले निर्वाचनका लागि ७ प्रदेशमा ८ मतदान स्थल तय गरेको छ । प्रदेश नम्बर १ मा निर्वाचन कार्यालय विराटनगर र बाली संरक्षण प्रयोगशाला विराटनगर, प्रदेश नम्बर २ मा महेन्द्रनारायण निधि स्मृति भवनमा मतदान स्थल तय गरिएको छ ।
बागमती प्रदेशमा औद्योगिक क्षेत्र व्यवस्थापन लिमिटेडको सभागृह, गण्डकी प्रदेशमा प्रदेश निर्वाचन कार्यालय, लुम्बिनी प्रदेशमा दाङको घोराहीमा रहेको कर्मचारी मिलन केन्द्र भवनमा कर्णाली प्रदेशमा प्रदेश निर्वाचन कार्यालय सुर्खेतको भवनमा र सुदूरपश्चिम प्रदेशमा धनगढीमा रहेको प्रदेश सभा भवनमा मतदानस्थल कायम गरिएको छ ।
निर्वाचन अधिकृतको कार्यालयमा मतगणनाका लागि व्यवस्था मिलाइएको छ भने आज साँझदेखि मतगणनाको काम हुने जनाइएको छ । । यसै गरि ‘दिउँसो ३ बजे निर्वाचन सम्पन्न भइसकेपछि मतपेटिकाहरू बन्द गरेपछि सर्वदलीय बैठक हुने शर्माले बताए ।
राष्ट्रिय सभाको निर्वाचनमा १९ सिटका लागि ९ दलका ४३ जना उम्मेदवारहरू प्रतिस्पर्धामा छन् । २ हजार २५ मतदाताले भोट खसाल्नेछन् । प्रदेश सभा सदस्य र स्थानीय तहका प्रमुख र उपप्रमुख मतदाता रहने व्यवस्था रहेको छ । उनीहरूको मतभार भने क्रमश १ भोट बराबर ४८ र १८ रहेको छ ।