संसद अवरुद्ध खुलाउने एमालेविनाको सर्वदलीय बैठकको निर्णय

काठमाडौं । सभामुख अग्नितप्रसाद सापकोटाले बोलाएको सर्वदलीय बैठक सकिएको छ । सिंहदरबारमा बसेको सर्वदलीय बैठक करिब ४ घण्टासम्म चलेको थियो  ।

सापकोटाले आजको बैठकमा सदनलाई सुचारु गराउने र छलफल अघि बढाउनेबारे कुरा भएको बताए । 

एमाले उपस्थित नभए पनि कांग्रेस, माओवादी केन्द्र, एकीकृत समाजवादी र जनता समाजवादीसहितले प्रधानन्यायाधीश चोलेन्द्र शमशेर जबराविरुद्धको महाअभियोग र अमेरिकी परियोजना एमसीसीबारे कुराकानी गरेका थिए ।

सभामुख सापकोटाले एमसीसीबारे पनि बैठकमा उपस्थित सबै दलका नेताले धारणा राखेको पनि बताए। ‘एमसीसीबारे सबैले धारणा राखेका छन्। सबैका धारणालाई तटस्थ र स्वतन्त्र रुपमा सुनेको छु’, उनले भने, 'सभामुखका हैसियतले मैले स्वतन्त्र र निष्पक्ष रुपमा निर्णय गर्नुपर्छ।’

उनले एमसीसीबारे घुमाउरो जवाफ दिँदै आफू ‘अम्पायर’ मात्रै भएको उल्लेख गरे। ‘अन्तिममा आउने संसदमै हो। तर सहमतिका साथ आउनुपर्छ भन्ने कुरा हो, उनले एमसीसीबारे भने, ‘म त  अम्पायर न हो, निर्णय गर्ने भूमिकामा दलहरुलाई नै छन्।’ एमालेविनाको बैठकमा संसद शुचारु गर्न निरन्तर प्रयास गर्ने निर्णय भएको सभामुख सापकोटाले बताए ।

 

© 2021 Quicknepal.com  |  All Rights Reserved.