गण्डकीका प्रदेशसभा सदस्यहरुले आज शपथ लिँदै

पोखरा । गण्डकी प्रदेशका प्रदेशसभा सदस्यले आज शपथ ग्रहण गर्ने भएका छन् ।

प्रदेशसभा सदस्यलाई प्रदेशसभाका ज्येष्ठ सदस्य मित्रलाल बस्यालले दिउँसो १ बजे शपथ खुवाउने कार्यक्रम रहेको प्रदेशसभा सचिवालयले जनाएको छ । बस्याललाई भने प्रदेश प्रमुख पृथ्वीमान गुरुङले बुधबारै शपथ ग्रहण गराएका थिए ।

नेकपा एमालेका ६५ वर्षीय बस्याल पर्वतको प्रदेशसभा – २ बाट निर्वाचित भएका हुन् ।

शपथ ग्रहणका लागि बिहान ११ बजे नै प्रदेशसभा हलमा उपस्थित हुन सचिवालयले आह्वान गरेको छ । शपथ ग्रहण समारोहमा राष्ट्रिय पोशाक वा जातीय पहिचान झल्किने पोशाक लगाउन भनिएको छ । साथै, प्रदेशसभा सदस्यहरुलाई शपथ लिन आउँदा निर्वाचन आयोगले दिएको निर्वाचित भएको प्रमाणपत्र साथमै लिएर आउन पनि सचिवालयले भनेको छ ।

प्रदेश प्रमुख गुरुङले आगामी पुस १८ गते प्रदेश अधिवेशन आह्वान गरेका छन् ।

 

© 2021 Quicknepal.com  |  All Rights Reserved.