काठमाडौं । विवेकशील साझाका अध्यक्ष रवीन्द्र मिश्रले विवेकशील साझा र सिटिजन्स डिसकशन फोरम तथा राष्ट्रिय जनता दरबार पार्टीबीच एकीकरण हुने जानकारी दिएका छन् ।
आइतबार विवेकशील साझाका अध्यक्ष रवीन्द्र मिश्रले समाजिक सञ्चालमार्फत् सोको जानकारी दिएका हुन् ।
राष्ट्रिय राजनीतिमा रूपान्तरणकारी हस्तक्षेप गर्न सक्ने बृहत्तर वैकल्पिक शक्ति निर्माण गर्ने उद्देश्यले विवेकशील साझा पार्टी, सिटिजन्स डिसकशन फोरम तथा राष्ट्रिय जनता दरबार पार्टीबीच एकीकरण हुने बताइएको छ ।
मिश्रका अनुसार विवेकशील साझा पार्टीको आज बसेको केन्द्रीय समितिको बैठकले दुई-तिहाइ बहुमतका साथ एकताको सहमतिपत्रलाई अनुमोदन गरिएको छ ।
एकीकृत पार्टीको नाम विवेकशील साझा पार्टी रहने भएको छ भने रवीन्द्र मिश्र एकल कार्यकारी अध्यक्ष रहने भएका छन् ।
के हो सिटिजन्स डिसकशन फोरम भनेको ?
करिब डेढ दशकदेखि बृहत्तर राजनीतिक शक्ति निर्माणका लागि नियमित रूपमा बहस चलाउँदै आएको समूह हो फाेरम। यसमा विभिन्न पेसाकर्मी, अभियानकर्मी र राजनीतिक पृष्ठभूमि भएका व्यक्ति आबद्ध छन् ।
‘राष्ट्रिय स्वाधीनता, सार्वभौमिकता र नेपालीको नाम र शान’ यसको मूल नारा हो । यो समूह २०७१ सालमा भ्रष्टाचार विरोधी अभियानका रूपमा स्थापना भएको थियो ।